మధ్య తరగతి ఆదాయ పన్ను తగ్గించలేమా..!

దేశాభివృద్ధికి ప్రజలు చెల్లించే పన్నులే ఆధారం. పన్నులు లేకుండా ప్రభుత్వం నడవదు. ప్రజాసంక్షేమం, ప్రగతి రథం కదలడానికి నిధులు పన్నుల నుంచే వాసులు చేయబడతాయి. పన్ను వసూళ్లలో వేతన జీవులు ఎలాంటి అక్రమ మార్గాలను వెతక్కుండా సరైన పద్దతిలో పన్నులను కచ్చితంగా, సకాలంలో చెల్లిస్తున్నారు. వ్యాపార వర్గాలు పన్నుల ఎగవేతలకు దొడ్డి దారులు అన్వేషించవచ్చు, బిలియనీర్ల పన్నుల రేట్లను ప్రభుత్వమే రాయితీల పేరుతో తగ్గిస్తున్నది. నిరుపేదలు, వ్యవసాయ వర్గాలు పన్ను పరిధిలోకి రావడం లేదు. మధ్య తరగతి వేతన జీవులే ప్రభుత్వానికి తేలికగా దొరుకుతున్నారు. ఇలాంటి భారత మధ్య తరగతి వర్గాలు పన్ను పోటుతో నవ్వలేక, ఏడ్వలేక అయోమయ స్థితిలో త్రిశంకుస్వర్గంలో దిక్కుతోచక కొట్టుమిట్టాడుతున్నారు.

బిలియనీర్ల కన్న మధ్య తరగతికి పన్నులు ఎక్కువ:
సంపన్న వర్గాలకు కార్పొరేట్‌ పన్ను 30 శాతం నుంచి 22 శాతానికి తగ్గించడంతో పాటు నూతన మాన్యుఫాక్చర్‌ కంపెనీలకు పన్ను 15 శాతం మాత్రమే వసూలు చేస్తుండగా మధ్య తరగతి/దిగువ మధ్య తరగతి వర్గాల నుంచి మాత్రం 30 శాతం వరకు పన్నులు వసూలు చేయడం విచారకరం. ఆర్థిక సంవత్సరాలు 2020, 2021ల్లో బిలియనీర్ల కార్పొరేట్‌ పన్నులు 30 నుంచి 22 శాతానికి తగ్గించడంతో ప్రభుత్వం 1,84,000 కోట్ల ఆదాయం కోల్పోయింది. కార్పొరేట్‌ పన్నులు తగ్గించడంతో దేశీయ ఆర్థిక ఆరోగ్యం మెరుగుపడుతుందనే వాదన కూడా చేస్తున్నారు. మధ్య తరగతి 30 శాతం వరకు పన్నులు చెల్లిస్తుండగా బిలియనీర్లు 22 శాతం మాత్రమే కట్టడం సమర్థనీయంగా లేదని, 01 ఫిబ్రవరి-2023న కేంద్ర ప్రభుత్వం ప్రవేశపెట్టే యూనియన్‌ బడ్జెట్‌లో మధ్య తరగతి వర్గాలకు పన్నులు తగ్గింపు చేయాలని కోరుతున్నారు.

మధ్య తరగతి ఆదాయ పన్ను తగ్గించలేదా…!
వేతన మధ్య తరగతి వర్గాలకు పన్నుల మినహాయింపు కనీస ఆదాయం ప్రస్తుత 2.50 లక్షల నుంచి 5.0 లక్షలకు పెంచాలని, తదుపరి స్లాబుల్లో పన్ను రేట్లు గణనీయంగా తగ్గించాలనే డిమాండ్‌‌ గత కొన్నేళ్లుగా వినిపిస్తున్నది. ఇదే విషయాన్ని దేశ ఆర్థికశాఖ మంత్రి నిర్మల సీతారామన్‌ కూడా సమర్థిస్తూ మాట్లాడడం తాను కూడా మధ్య తరగతి పన్ను చెల్లింపు వర్గానికి చెందిన దానినే అంటూ కొత్త ఆశలను రేకెత్తిస్తున్నది. మధ్య తరగతి కడుతున్న పన్నులతో ఆవర్గానికి అవసరమైన స్మార్ట్‌ సిటీస్‌ అభివృద్ధి, మెట్రో రైల్‌ సదుపాయాలు, నగర మౌళిక వసతుల అభివృద్ధి, జీవన ప్రమాణాల పెంపుదల లాంటి సేవలు సుసాధ్యం అవుతున్నాయని ప్రభుత్వం వివరించడం చూసాం. భారతంలో వార్షిక ఆదాయం 5 లక్షల నుంచి 30 లక్షల వరకు ఉన్న వర్గాలను మధ్య తరగతిగా, సాలీనా 30 లక్షల కన్న అధిక ఆదాయం కలిగిన వర్గాలను ధనవంతులు/సంపన్నుల/కుబేరులుగా వర్గీకరించబడ్డారు. ఇండియాలో 3 శాతం సంపన్న వర్గాలు, 30 శాతం మధ్య తరగతి వర్గాలు, 67 శాతం పేద వర్గాలు ఉన్నారని ఇటీవల ‘ప్రైస్‌ డాటా ఏజెన్సీ’ విశ్లేషించింది. కుబేరుల పన్ను రేట్లు 30 శాతం కన్న అధికంగా, మధ్య తరగతి వర్గాలకు 25 శాతం కన్న తక్కువగా ఉండాలని నిపుణులు అభిప్రాయపడుతున్నారు.

మధ్య తరగతి ఆదాయ పన్ను విధానాలు:
సగటు భారతీయుడు 54 శాతం వరకు ప్రత్యక్ష, పరోక్ష పన్నులను కడుతుండగా, అమెరికన్లు 51 శాతం వరకు, చైనీయులు 48 శాతం వరకు, యూరోపియన్లు 60 శాతం వరకు పన్నులు కడుతున్నారని తెలుస్తున్నది. భారత్‌లో ప్రస్తుత నూతన పన్ను విధానంలో వార్షిక ఆదాయం 2.5 లక్షల వరకు పన్ను మినహయింపు ఉండగా, 2.5 లక్షల నుంచి 5.0 లక్షల ఆదాయం వరకు 5 శాతం ఆదాయ పన్నులు కడుతున్నారు. వార్షిక ఆదాయం 5.0 నుంచి 7.5 లక్షల వరకు 10 శాతం పన్నులు, 7.5 నుంచి 10 లక్షల వరకు 15 శాతం ఆదాయ పన్నులు వసూలు చేస్తున్నారు. అనంతరం 10 నుంచి 12.5 లక్షల వరకు 20 శాతం, 12.5 నుంచి 15 లక్షల వరకు 25 శాతం ఆదాయ పన్ను చెల్లిస్తున్నారు. వార్షిక ఆదాయం 15 లక్షలు దాటిన వారికి 30 శాతం ఆదాయ పన్నులు చెల్లించడం జరుగుతోంది. పాత విధానం ప్రకారం 2.5 నుంచి 5 లక్షల వార్షిక ఆదాయానికి 5 శాతం,5 నుంచి 10 లక్షల వరకు 20 శాతం, 10 లక్షల పైన ఆదాయానికి 30 శాతం పన్నులు వసూలు చేశారు. పన్ను చెల్లింపుదారులకు పాత లేదా కొత్త విధానాలను ఎంపిక చేసుకునే స్వేచ్ఛను కల్పించారు. నూతన పన్ను విధానంలో చెల్లించే వేతన జీవులకు స్టాండర్డ్‌ డిడక్షన్‌, ఇంటి కిరాయి, సెలవు ప్రయాణ సహాయం, గృహ రుణాలు, సెక్షన్‌ 80సి, 80డి, 80సిసిడి, పిపియఫ్‌, యన్‌యస్‌సి, ఈపియఫ్‌ లాంటి పన్ను రాయితీ ప్రయోజనాలు కల్పించక పోవడం ఆక్షేపణీయమే అని వింటున్నాం.

2017-18 నుంచి నేటి వరకు నూతన పన్ను విధానం ప్రవేశ పెట్టినప్పటికీ మధ్య తరగతి వర్గాల బేసిక్‌ ఆదాయ పన్ను మినహాయింపు లిమిట్‌లో పెద్ద మార్పులు కనిపించలేదని, రాబోయే అసెంబ్లీతో పాటు 2024 పార్లమెంట్‌ ఎన్నికలను దృష్టిలో పెట్టుకొనైనా ఇప్పుడు మధ్య తరగతి వర్గాలకు ఊరట లభించవచ్చని ఆశిస్తున్నారు.

డా: బుర్ర మధుసూదన్ రెడ్డి
కరీంనగర్‌ – 9949700037